بقلم الشاعر"محمد الشاذلي"

شوف واسمع
الكون دا كان كله ضلام
ابدا ما فيه ذرة امان
والبغى فيه غطى ما خلى
والكفر فارش ع المكان
والظلم ع البشريه كاسى
ظلم فرس معاه رومان
ناس ما عارفه فيه اله
وناس بتعبد ف النيران
وناس بتعبد ف الحجاره
وناس بتغرق ف الهوان
اللاتى والعزه ونايله
والأساف كان ع البيبان
وف وسط كعبة ربنا
وبره مفروش ع الحيطان
وكفر ع الكسوه معلق
ده ف الحرم شفتوا الجنان
والقلوب من جوه نشفت
والناس بقت فعلا غيلان
والأب كان دافن لبنته
صاحيه بصه ف عين جبان
عيشه كانت ظلم بين
ظلم واصل للعنان
ودا جزء م الصوره مش اكتر
سامعنى ياللى ليك ودان
وف وسط ما بقولك وتسمع
الحق شقشق لاح وبان
من عند بيت عب مطلب
طالع وواضح للعيان
نور جماله طفى نارها
واتكسرت شبابيك ايوان
ما هو اللى جه مش اى حد
دا المصطفى عطر الزمان
اسمه ف الدنيا محمد
وف السما محمود كمان
للطيبه رمز مالهش وصف
وللرحمه. بحر من الحنان
وف الأمانه قول وطول
ماهو اللى رباه.. الرحمن
صادق ف وعده وف كلامه
جميل ف وصفه فصيح لسان
من العرب اشرف نسب
جدو الخليل نبى كنعان
حلو الملامح طبعه مسامح
ابدا ما جارح ولا منان
وربى حبه هناه بقربه
وملاله قلبه بالقرأن
هو البشير هو النذير
هو الامير يوم الميزان
وهو طه ف يوم ماجاها
نور سماها والضلمه عان
يارب وصفى ماراح يكفى
ولا يوم ح وفى قدره اللى بان
بتمنى اشوفه والمس كفوفه
ف يوم وقوفه ع الحوض كمان
نبع المحنه صاحب السنه
فاتح الجنه مع رضوان
اغفر وزرى جاوزت قدرى
ودا مش بأمرى داالقلب لان
ادعوا معايا يقبل دعايا
رب البرايا لو اجلى حان
اهنى بقربه وافوز بحبه
وابقى جمبه على باب جنان
والقلب يسعد وابقى اسعد
بجوار محمد النبى الأنسان
يارب صلى ع الهادى اللى
كان قوله تمللى واضح البيان
صلو معايا على خير البرايا
رسول الهدايا النبى العدنان
بقلم. محمد الشاذلى